عايز اكتب وأحكي وارغي واهري وانظّر
واتفلسف فلسفة خايبة واتمنظر
واقول رؤى مشوفتهاش واحكي قصص معيشتهاش
اروي عطش وداني لقصة بطولة مطلقة ؛
انا فيها الفارس والحارس ومفجر ثورة مارس
اهدي المعجبين بعدها حكاية
ازاي اتكتبت اجمل رواية
وواحدة مالجمهور الغفير تجيني
*بنوتة*
رامية ليلها ورا ضهرها
لا فيه ضفاير ولا عقد
يطير يحل كل العقد
تقولي؛
وقعلي النسخة ديا
وانا عقلي يشط ويتعجب
اوقع فين؟؟
ما كل الصفحات ماليانة
ولا فيها سطر فاضي
ولا ورقة تشيل حتى علامة
بصيت في عنيها من تاني
وانا عارف نفسي اني اناني
قولتلها
تديني صفحتك اكتب
وعليها اقول كل اسامي
ناس عيشتهم
وناس موتهم
وبطولة شوفتنا فيها
لسة مكتبتش حكاويها
ما تيجي معايا اميرة
وتبقي بطلة قصتي
وفعينك ؛ اكتب غنوتي
واحارب لاجلك التنين
وانط اسوار السنين
وارجع في ليلة زمان
واصبح صبي العشرين
…...
بصيتلي باستهانة
وقالتلي بدون اهانة
صفحاتي زي كتابك
كل سطورها ماليانة
(اسكت انا بقه؟! لا طبعا)
قولتلها حبري غير
يمسح دموع الليل
ويتشربه قلبك
وتصبحي عاشقانة
ضحكت تاني الصبية
ضحكة ثقة بعصبية
ورمتني بسهم ننّي
نن
عيونها القوية
قالت نظرتها حاجة
وما تسئل ازاي وليه
مهي اصلها محتاجة
قالتلي مما قالت
مش شايفة حد ماسكك
طب قوم وريني نفسك
..
ويقوم ازاي الجدع
والسهم متسدد وصايب
تشوفه تقول قتيل
لا يمكن يكون طايب
ويطيب من ايه الفتى
ومن ايه راح يطيب
من غمزات الخدود
ولا ريحة الطيب
لو هاوده تفاحها
ورودها راح تدميه
بشوكها ورموش
زي السيوف بتارة
تعدي على قلبه
تسيب يجي الف أمارة
وبعد نظرة تانية
ساب الولا نفسه
وقال بعلو الصوت
خلاص انا مِسلّم
مش عايز اكتب حاجة
انا جايلك اتعلم
إرسال تعليق