( الثورة النسوية على الرجال بين (سوتيان غدير) و(طرحة فريال)

بعد سا الخير والذي منه،
لا اخفيكم سرا يا ولاد اني في ليلة من ذات الليالي كنت بتفرج عالاسكيش الغنائي للثلاثي الي فيه الكوبلية سابق الذكر، واذ افوجئ بكم اسألة وجودية تنهمر عليا من كل اتجاه، يعني على سبيل المثال لا الحصر
هما ليه شالوا الدو؟
واشمعنى شاهين الي يجي مكانه؟
طب مين دول اصلا الي عملوا كل ده؟
طب الحال اتغير بعد ما التبديل ده تم؟

والحقيقة اني اعدت الاستماع للاسكيتش غير مرة وملقتش اجابة واضحة وصريحة تشفي غليل تساؤلاتي، ربكم والحق انا ميغظنيش اكتر من اني اسأل ولاقيش اجابة، وعليها قررت اني اقوم بعملية بحث وتقصي توصلني لمرادي، وبما انكم حبايبي يعني مقدرش احوش عنكم الي عرفته،

الحكاية باختصار ان الدو فضل كتير في مكانه، مالي مركزه وقايم بدوره على اكمل ما يكون _بالنسبة طبعا للي جايبينه_ بس سبحان من يغير ولا يتغير تقريبا بدأ يجيله حاله من التوحد مع المنصب، اسف اقصد المركز،
فبدأ يعك الاول عك خفيف وبعدها العك بقا على تقيل، يعني مثلا بدأ يتدخل في التشكيل ويجيب اصاحبه يلعبوا على حساب الي احسن منهم، ولما ولاده كبروا جابهم كمان وبقا ينزلهم يلعبوا كده عافية يعني وبدأ ينسى انه اصلا موجود في مكانه لانه متجاب للمكان مش هو المكان، وده معناه ان الي جابك يقدر يشيلك!
وهنا كانت اجابة السؤال المحوري،
(الي يقدر يجيب شاهين هو بس هو بس هو بس الي يقدر يشيل الدو، مش حد تاني نركز يا ولاد)

الناس دي بقا الي هي الادارة الكبيرة لو جاز لي القول خدت قرار تشيل الدو لما حصل منه كل الي فات دهون،وطبعا هنا ياتي سؤال ازاي نشيل الراجل بعد كل العمر ده، ده فيه ناس متوعاش على غيره، لدرجة وصل بالبعض انهن يقولوا مفيش اصلا حد اتخلق ينفع يقف مكانه،
نضيف للي فات انه ليه شعبية بين اوساط الجماهير الي كانت ما بين متخوفة من تغييره والمجهول في نظرهم يعني بعده، او حبت الراجل حب استكهولمي،

المهم مطولش عليكم الناس الكبيرة خدت قرار التغيير وبدأت تحط وسط الجماهير ناس تجهر بالنقد لالدو ومستواه، وشوية شوية بدا صوت النقد يعلى لما حصل المتوقع وبدأ يلاقي استجابة،
النقد اتحول لتذمر، وشوية وهوبا انفجرت الحماهير في المدرجات بتطالب بتغيير الدو فورا ومعاه كل الي جابهم يلعبوا،
طبعا الي كانوا جايين على حسه مسكتوش وحصلت كام عاركة كده! على خفيف انتهت بان الدو مشي بالعافية، بس وهو ماشي حلف ما حد يلعب وقام جايب الشبكة نصيين، عشان يعكنن عالناس،
طبعا مطالب المدرجات وقتها كانت عليت لدرجة انهم طلبوا يتحقق معاه في اتهامة بالمحاباه والفساد الكروي (ده طلع كان بيبيع الماتشات)

المهم فعلا اتاخد من الدار للنار واتقرصت ودنه بالجامد عشان محدش من الي حيجي وراه يعمل كده تاني، بس برضك العشرة متهونش على ولاد اي حاجة تحبها حطها، والادارة طلعته ابيض من الصيني بعد غسيله خصوصا انه كان شايل ادلة فساد عالي جابوه ومشوه، وعليها يا اخونا، والجماهير في المدرجات اتقسمت وكل شوية منهم خدوا جنب؛ ناس لسه بتفتكر الدو، وناس صدقت شاهين جه بمزاجهم، ويعرفوش ان اصلا كل ده كان معمول عشان يجيبوا عبد الصمد في الاخر،
....
وكفاية كده كلام في الكورة لاني مبفهمش فيها البته يعني