كنا وقفنا عند إرهاصات حرب الثلاثين عاما، الي انا ختمت كلامي بوعد الحديث عنها وعن ظروفها وأسبابها وأحداثها وأهم نتائجها، بس خليني الاول اقول ان ليا طريقة مختلفة نوعا ما في مقاربة الأحداث اللي بالشكل ده وطريقة معالجة سردها، تقدروا تقولوا يعني بحط التاتش بتاعي؛ يعني بعد ما وضحنا الكتلة الاولى مثلا الي المفروض كانوا أصحاب الهيمنة في عموم غرب ووسط أوروبا في الوقت ده، المفروض كنا نشرح مين الطرف المضاد، بس ده مش حعمله انا لا؛ انا حدخل في قلب الموضوع على طول وخلال سرد الأحداث هنعرف انا محددتش بقية الأطراف ليه؛
نقطة مهمة كمان نوضحها؛ حرب الثلاثين دي مكانتش لا اول ولا اخر حرب او نزاع داخلي اوروبي، ايا كانت مسبباته، بل دي يمكن جت بعد ما يقارب القرن ونصف على بدء دعوات الاصلاح اللوثرية؛ الي لقت استجابة كبيرة وجدا كمان خصوصا في المانيا وشمال اوروبا النوردي (تقريبا اوروبا الجرمانية يعني) والاراضي المنخفضة الي هي هولندا، وحصل حروب كتير ومعارك ما بين المحدودة والعظيمة الاثر، نقدر نعتبرها اشبه بالتسخين او خلينا نقول مباريات تمهيدية، وكانت حرب الثلاثين دي هي الفاينال،
بدأت أحداث اللقاء في بوهيميا، اسف اقصد أحداث الحرب في التشيك، حدثة صغننه كده، التشيكيين اتحولوا للوثرية والكلفنية وده مذهب فرعي يختلف في بعض التفاصيل عن اللوثرية بس يعد اصلاحي بلا ادنى شك يعني، وفي نفس الوقت كانت التشيك جزء مهم من أملاك الهابسبورج الكاثوليك، الامبراطور كان باعت اتنين نواب يقابلوا مندوبين عن الشعب البروتستانتي، تقريبا الكلام خد منحى مش لطيف، قاموا شدوا في بعض، قوم التشيكين يرموا نواب الامبراطور من البلكونة من ارتفاع عشرين متر تقريبا (مكنش باين ان التشيكيين بالغباوة دي، ده حتى نيدفيد كيوت).
المهم الامبراطور شالها في قلبه والحركة دي حزت فيه جامد؛ قالك طب وراس جدي ما انا ساكت وقام عامل حملة تاديب عليهم، و التشيكيون أعلنوا ثورة سمعت في كل ارجاء اوروبا؛ الي كانت ملتهبة فعلا بس النار كانت تحت الرماد وجت الحادثة دي ولعت الدنيا تاني؛ البابا يسكت؟ لا طبعا، حب يجامل قام اعلن دعمة المتوقع مسبقا يعني وحاجة كده شبة الجهاد المقدس، الغريبة الثوار في الاول حققوا شوية نجاحات لدرجة أنهم وصلوا وحرروا التشيك و حاصروا فيينا الي هي واحدة من أهم حواضر الهابسبورج، ولما الموضوع وسع كده قامت الدنمارك اللوثرية دخلت الحرب كمان من أقصى شمال القارة ضد الدوقيات الالمانية الي كانت بعضها لسه كاثوليكية،
بس الكاثوليك استجمعوا نفسهم بسرعة وعملوا ريمونتادا تاريخية الحقيقة؛ وقهروا الثوار في كذا معركة متتالية أجبرت قادتهم عالهرب وتسببت الهزائم دي في عودة التشيك للكاثوليكية تقريبا لغاية يومنا هذا؛ مش كده وبس، الكاثوليك عملوا هجوم مضاد على هجوم الدنماركي انتهى بهزيمة ساحقة للدنماركين وصل بيه جيش الكاثوليك لغاية كوبنهاجن ده بعد ما استرد كل الأراضي الي خسروها في اول الحرب؛
مين بقه كان نايم وصحي وفتح الفراندة بتاعت القصر وطلع يشرب قهوته الصبح كده لقى الدنيا والعة قصاده الناحية التانية؟
جوستاف امبراطور السويد الي كانت زي اغلب شمال اوروبا لوثرية كما سبق وقولنا؛ تخيل تبقى قاعد في اقصى شمال القارة في امان الله الحرب تجيلك لغاية شطك؛ ده الي حصل فعليا؛ القوات الامبراطورية كانت بتحاصر كوبنهاجن عاصمة الدنمارك الي بتطل على بحر البلطيق من الجنوب والسويد الناحية التانية طوالي؛ الراجل قال ساعتها حكمة جميلة (لو سكتنا لجائنا البابا حتى هنا) - تصرف مني - ولم رجالته وجمع جيشه وعبر البلطيق ونزل على الشواطئ الالمانية واجتاح القوات الامبراطورية بشكل مزري الحقيقة، الي انهارت قصادة تقريبا، المهم الراجل مطولش في الحرب وخد رصاصة طب ساكت بس جنرالاته كملوا المشوار بنفس الحماس، مين بقه ثارت ثائرته للانتصارات دي وهب لإيقاف السويد؟
اوعى تقول، او اوعى تفكر انها احدى الدول التابعة للبابا، اقولك لا معلش طلعت اوت، ده الدنمارك الي كانت لسه من سيكة متحاصرة ومتبهدلة والكاثوليك مسففينها التراب هي الي دخلت الحرب ضد السويد ؟؟؟؟؟!!!!!
ازاي يا جدع بس الكلام ده دول لوثريين زي بعض؟
اقولك اتقل بس انت لسه شوفت حاجة، ده انا حبهرك، طبعا الدنمارك اكلت علقة موت تاني بس المرة دي على ايد السويد بقه؛ وهنا بدا واضحا ان غزاة الشمال عائدون وبقوة لإجتياح كامل اوروبا؛ طب الكاثوليك يسكتوا؟
نو واي يا صديقي، إسبانيا سيدة العالم في عصرها وأوانها كانت بتبعت دعم خفيف خفيف في اول الحرب لانها شايفة انتصارات ملحوظة لقرايبها واسبانيا في الوقت ده كانت عرش هابسبورجي بس منفصلة كليا عن الامبراطور الي كان احيانا بيكون اسباني (سبق ووضحنا في المقال الي فات موضوع علاقات النسب والمصاهرة) بس لما لقت ان الهزائم بتنزل بيهم مكدبتش خبر؛ وهي كان ليها كده كده تار بايت في الاراضي المنخفضة بعد حرب الاستقلال الهولندية الي انتهت باجبارها على الاعتراف بجمهورية هولندا مقابل اعتراف هولندا بمملكة هولندا الاسبانية (الي بتشمل حاليا بلجيكا ومناطق من فرنسا والمانيا)، فقالت تضرب كل العصافير بحرب واحدة؛ تنصر قضية دينية وتسترد أراضي كانت مهمة جدا ليها (هولندا) وتكسر شوكة السويد الي وضح انها في طريقها لتتحول قوة عظمى ولاعب مهم في الساحة الدولية الي كانت لسه بتترسم ابعادها؛ وفعلا بعتت قواتها البرية الي كانت ذات شهرة فائقة في عموم العالم وقتها بأنها القوات التي لا تقهر؛
مين بقه اتخض لما ده حصل؟
السويد؟
تؤ
يبقى اكيد هولندا؟
تؤ برضو متتعبش نفسك انا حقولك؛؛ فرنسا يا سيدي هي الي اتشالت واتحطت ومجالهاش نوم؛ طب ليه؟ دول كاثوليك زي بعض واستحالة يعني إسبانيا تعض فيهم! اقولك صحصح بقه معايا كده وسيبك من لوثري وكاثوليكي ، الي حصل ان فرنسا كانت تحت حكم سلالة تانية من سلالات الملوك وهي (البوربون-لويس الاول والتاني ..الخ)، ودول كانوا كاثوليك صرف يعني، وميجيش في دماغك مثلا كاثوليك كده وكده، لا فرنسا في الوقت ده تحديدا تحت حكم ثيوقراطي ديني صرف، المتحكم في الأمور فعليا وقتها كان كاردينال (مش متذكر اسمه للاسف) ودي رتبة تحت رتبة البابا مباشرة،
طب ازاي يزعلوا من دخول اسبانيا الحرب، ده المفروض كان واجب عليهم اصلا!!
اقولك يا مولانا ما يريح قلبك ويقر عينك وافسر لك ليه فرنسا قلقت؛ كما تعلم ان اسبانيا تقع جنوب فرنسا جغرافيا، ومملكة هولندا الاسبانية تقع شمالها الغربي، فلو قدرت اسبانيا تحقق انتصارات فعالة في الساحة الرئيسية للمعارك وقتها الي هي المانيا الحالية حتقدر تضم اراضيها في اسبانيا الهولندية، للاراضي الجديدة الي حتكسبها لو انتصرت وبكده تحكم حصار تام على فرنسا شمالا وجنوبا؛
غير ان آل بوربون كانوا غيرانين من آل هابسبورج، وزهقانين من البابا وتحكماته الي وصلت بيه يدي اسبانيا والبرتغال حق اقتسام العالم عن طريق صكوك احتكار التجارة الي كان بيديها الاتنين دول والي مهدت ليهم يتفقوا فيما بعد على مناطق النفوذ والاستكشاف! اه فعلا ده حصل ووقعت اتفاقية بين الاتنين بتقسم العالم بخط طول معين في اواخر القرن الـ١٥ بتدي الحق لكل واحدة في حكم ما تكتشفه من غير ما التانية تنازعها فيه (شوفتوا الجبروت؛ املاك ابوهم احنا) وطبعا الاتفاقية دي كانت بتمنع اي حد تاني انه ينزل الملعب بتاع العالم الجديد وآسيا والا حيكَسر اوامر البابا وبالتالي يعرض نفسه لعقوبة الحرمان الكنسي يعني يموت كافر، وطبعا مفيش كاثوليكي يتمنى ده ابدا؛
ولهذا يا عزيزي الي هو كل ما سبق يعني قررت فرنسا الكاثوليكية تدخل الحرب بس ضد اسبانيا الي هي كاثوليكية برضو؛ ضاربة عرض الحائط بكل الروابط الدينية؛ وحققت انتصار لافت على الإسبان فرض وجود فرنسا فيما بعد كقوة ليها وزنها في أوروبا ومن ثم العالم اجمع؛
اعتقد كده بدأت حضرتك تعرف نتيجة الحرب النهائية الي انتهت رسميا بتوقيع اتفاقية فيستفاليا، الي أقرت بحق الأمراء في اختيار ديانات بلدانهم واعترفت بشكل نهائي بلبروتستانت في عموم أوروبا؛ غير أنها مثلت ضربة قاضية لسلطات البابا الي شهدت تراجع مهول بعد الحرب دي؛ مش كده وبس لأ حصل تغيرات على مستوى التوازن السكاني (الديموغرافي) يعني هجرات متبادلة ما بين الكاثوليك والبروتستانت، كل طائفة٧ تروح تعيش في الحتة الي حاكمها قرر يختار ديانة موافقة ليهم، طب ده في نظري بعض النتايج بس مش كلها، طب ايه اهم النتايج يا اولاد؛
انا موافق جدا لرأي قال إنها كانت حرب أظهرت بوضوح خدعة الستار الديني لصراعات النفوذ والمال (الاتنين مرتبطين اصلا، ده محتاج ده والعكس)، يعني أظهرت لنا مثلا خوف الدنمارك من تغول السويد وسيطرتها على جنوب البلطيق وتهديد مصالحها التجارية كبوابة للملاحة في المنطقة دي، بالرغم ان الاتنين نفس المذهب والدين وكمان الأصل العرقي (نورد) وكمان شوفنا فرنسا الي تحت حكم ثيوقراطي يفترض فيه طاعة الحبر الاعظم في كل أوامره ونواهيه، مش تتجاهل الطاعة لا ده تعارضها بحرب ضروس شنتها ضد واحدة من اقوى العروش الكاثوليكية وقتها؛
افتكر الأمر أوضح من شرحه ويكفينا تعليق هيئة تحرير الموسوعة البريطانية (انسكلوبيديا بريتانيكا) لما قالت وأنا هنا أنقل المعنى مش النص (أنها كانت أوضح مثل لصراعات المصالح تحت قناع الدين)،
المؤكد ان الحرب بدأها او بمعنى ادق اشعل شرارتها مجموعة من المتحمسين دينيا؛ بس الاكيد ان الي تقاسم غنائمها هما الطامعين دنيويا، الحرب دي عرفتني انا شخصيا اهم مبادئ السياسة في كل مكان صحرا كان او بستان؛ واحب اختصرهم في عبارتين ملهومش تالت؛ (المصالح بتتصالح)،، (خالتي وخالتك واتفرقوا الخالات)،،
مش ساركازم يمين بعظيم ما كده، دقق النظر حواليك في اي صراع سياسي او نزاع كبر او صغر، في اي بقعة في الارض، هتلاقية بيدور حوالين المبدأين دول، ليك مصلحة مع الشيطان؟
طب قوم اقضيها وبعدها ابقى اغسل ايدك كويس واطلع ألعنه على كل منبر متاح ليك؛ وقول فارقته خلاص دي كانت مره مضطر؛ صح؟
مش بيحصل يعني؟
أيا كانت اجابتك عزيزي القارئ احب اعرفها ده اكيد، اذا تكرمت يعني وسيبت تعليقك على ما سبق، وبما انك لسه بتقرا لغاية دلوقتي، فأحب اشكرك على سعة صدرك لكلامي رغم الطول الي اتمنى انه لا يصادف ملل، واحب اقولك ان لسه الكتاب منتهاش (استر يا رب)، لاننا حننتقل في الجزء التاني لمنطقة تانية من المعالجة للحقبة دي تاريخيا، احنا كنا عدينا عليها سريعا في اول مقال خااااالص وقولنا هنسيبها لوقتها واعتقد بعد ما انهينا بكل ما سبق من تقديمات حان الوقت اننا ندخل في اول مشاهد الفصل التاني من (مسرحية تأسيس النظام العالمي الجديد).
إرسال تعليق