( الثورة النسوية على الرجال بين (سوتيان غدير) و(طرحة فريال)

 

بتحبوا السيما؟

اه السيما ام افلام وكراسي دي؛

بتموتوا فيها؟

اه وانا كمان،

بس ايه قولكم ننفض للكراسي ونخلينا في الافلام؛ الي تخش تتفرج عليها من هنا ودماغك يمين تطلع ودماغك شمال؛

ايون؛ هوه الي فهمتوه، حنتلكم عن الرسايل الي ممكن سواء بشعورك او من غيره تغيرك، حنلف نجيب سوا افلام من كذا مستوى وناقشت كذا موضوع ونحاول نحطها تحت المجهر على قد ما نقدر وناقشها ونشوف سوا تفكيرنا اتغير كام مرة في كل مرحلة (قبل وبعد المشاهدة) 

عايز/ة تشاركنا الرحلة اهلا بيك وظبط موجة حسابك عالمقال ده

وقريبا

(تنبيه الالباب بما في الافلام من خطاب)

 (صراع الحضارات)

مصطلح مختصر؛ بس على اختصاره ده اتكتب فيه كتب واتعملت فيه نظريات ونظريات مضادة، وكمان اتألفت واتمثلت فيه افلام، بعضها كان خيالي، وبعضها كان تاريخي، استلهم صناع الافلام دي احداث حصلت، لعبوا فيها شوية واعادوا تقديمها لينا بهدف محدد؛ ايه الهدف وهل نجحوا فيه ولا لأ !!  

ايه الافلام دي او اهمها على الاقل؟

الاسئلة دي واجابتها حتكون موضوع اول حلقة من حلقات المقال ده

بعد قليل بحول الله

...

الحقيقة ان مصطلح صراع الحضارات او صدامها او تنظيمها في نظرية لها أُطر وسياق فلسفي وادبيات مش قديم قوي، رغم انه زي ما حنعرف من خلال السرد الي جاي؛ من اقدم الافعال الي مارسها البشر، من وقت ما عرفوا المدنية  والتحضر ويفترض ان زي ما اغلب المتابعين ليا من وقت كبير عارفين اني بهتم بما يسمى النظرة الكليّة، يعني مبعرفش ابص على الحدث مفصولا عن الي سبقه والي تلاه ده انا بعتبره بتر من السياق، النتيجة المعروفة لاي بتر هي (التشوه)

 

حنطلع بمعلومات مشوهة لا حتفيدنا ولا حتعرفنا جديد، وعشان كده اول ما حبدا بيه المقال اني احاول اقدم مختصر مبسط للنظرية الي صاغها (صامويل هنجتون) في منتصف تسعينات القرن العشرين كرؤية ليه لشكل العالم في عصر ما بعد انهيار المعسكر الشرقي والشيوعية  كايدولوجيا حاكمة ؛

 نظريته قامت على فرضية ان العالم حيتحول لمعسكرات متنافرة، نواة كل معسكر منهم هي (ثقافته الخاصة)، مش الايدولوجي يعني الراجل فرق ما بين الثقافة  وبين المذهب الفكري، وقال في سبيل اثبات ده، ان الانسان ممكن يغير دينه او مذهبة الاعتقادي بس ميقدرش يغير ثقافته، وفيه مثال شهير بيتضرب بانك ممكن تكون روسي؛ تنام شيوعي وتصحا تاني يوم الصبح تقرر تبقى ليبرالي رأس مالي، بس عمرك ما حتقدر تكون فارسي معتبرا ان الثقافة ليها عمق اكبر في العقول الجمعية للشعوب من الايدولوجيا،

وعشان كده قال مهما انهارت او نشات مذاهب او ايدولوجيات حتفضل ذات اثر جانبي في الصراع القادم بين الحضارات الي قام بتقسميها تقريبا تمانية (ان لم تخني الذاكرة)

طيب الراجل طلع بالنظرية وقوم الدنيا وقعدها، هل علماء السياسة والاجتماع و...الخ سكتوله ؟؟

الحقيقة ان محدش سكتله، وناس كتير ردت عليه بانه تجاهل فروق واضحة بين طباع الشعوب وخصائص بعض الاديان كمان، بتصبغ معتنقيها بثقافة خاصة مهما كانت جنسيتهم او اصولهم العرقية والحقيقة اني هنا مش في معرض الرد على النظرية او دعمها، بقدر ما انا عايز اوضح منها الشكل الي بدات تسير فيه مراكب المنظّرين الغربيين لشكل العالم في بداية الالفية الجديدة  

بالمناسبة حتى بعض المعترضين على النظرية كان اعتراضهم عليها شكلي، بس وافقوا ضمنا ان فعلا حيكون فيه صراع بل وحيشتد، بس كان رايهم مختلف في المسببات، ومنهم على سبيل المثال (ناعوم تشومسكي) الي من قبل وقت ظهور نظرية (صامويل) للوجود بيتكلم عن انقسام العالم لمعسكرين( شمال ابيض مقطط ونضيف ولطيف بس مفتري وظالم) (وجنوب اسمر انشأ اول اشكال للحضارة الانسانية) وبعدها الشمال عمل مقلب حرامية في الجنوب، قاله تعالى اوريك العصفورة وهوبا رماه من قطر التقدم ، ومن ساعتها والجنوب لا لاقي القطر، ولا حتى شاف العصفورة.

- اسف للساركازم بس الموقف فعليا عامل كده

وهو ده تقريبا صلب كلام (تشومسكي)، الي بيعتبر الشمال والغرب في حالة غزو مستمر للجنوب والشرق من (٥٠٠) تقريبا وبدون توقف.

من وجهي نظري ان ابرز الفروق بين الاتنين في تفسير الصراع، ان (صامويل) شايفه ثقافي حتى لو لحق بيه جانب اعتقادي، وناعوم شايفه اقتصادي بياخد الجانب الثقافي او الديني كستار يشرعن بيه نهب واستغلال ثروات الشعوب المنكوبة (الي هو احنا يعني)

ولا اخفيكم سرا يا ولاد اني اجد في نفسي ميل لرأي تشومسكي، خصوصا لو رجعنا لاول حالة مؤرخة لصدام حضارات واسع النطاق في التاريخ بين ما يمثله (الشمال) و (الجنوب) .. ممكن بعضكم يفتكر اني حروح مثلا لحروب الصليبية، وده مش صحيح، او تفتكر اني حرجع ورا شوية واتكلم عن الغزوات الاسلامية وده برضو غلط، انا نفسي طويل (رغم اني مدخن) ، وحشد اسبرينت عكس عقارب الساعة وارجع بيكم للقرن ١٢ قبل الميلاد

يااااااه كل ده !!

اه يا فندم كل ده، مدام حنستفيد ايه الضرر (طبعا انا اتمنى فعلا الافادة لكل قارئ)

 

نرجع مرجوعنا ونشوف الزمن الي انا اخترته للتثميل بيه على فكرة (الصدام الحضاري واسع النطاق)

الحقيقة ان القرن ده وما يليه من قرون حوالي اتنين شهدوا اكبر موجة غزو اتسجلت لوقتها، نركز هنا؛ انا مش بتكلم عن موجات هجرة لشعوب او قبائل انا بتكلم عن غزو بغرض افناء حضارة قائمة وانشاء اخرى مكانها، وفي نفس الوقت مبتكلمش عن غزوات وحروب محدودة حتى لو شهدت ويلات طبيعي تشهدها اي حروب،عموما المقصود حيظهر مع قادم السرد.

الزمن ده شهد ظهور لمجموعة من البشر رغم ان التاريخ كان شحيح في الي قاله عنهم الا ان المؤرخين رغم تضاربهم في فرضيات ظهورهم وانسابهم (اصلهم العرقي يعني) اتفقوا على حاجات، وهي بالنسبة ليا مربط الفرس، (شعوب البحر)؛ ده اسمهم زي ما نقلته لينا اقدم منقوشة فرعونية ذكرتهم، اه بس كده، قالوا شعوب راكبة مراكب جايين من بلدان الشمال وطمعانين في شوية الطين الي بنزرعهم ومية النيل الي بتروي العطشان (لو عرفوا الي حيحصل اليومين الجايين حيحمدوا ربنا اكيد انهم متوفقوش في الغزو ده)  

ايون فعلا الغزوة دي فشلت ورغم تكرار الشعوب دي للمحاولات من كذا اتجاه برا وبحرا وفي عهد كذا ملك، كان الفشل برضك من نصيبهم،

 

حد هنا ممكن يقولي، طب ما عادي الهكسوس قبليها حاولوا ونجحوا، حقولك سليم، بس الهكسوس رغم انهم شعوب سامية بدوية الطباع لما دخلوا مصر واحتلوا شمالها وجزء من وسطها، مغيروش ديموغرافيا الارض، اه هاجروا باعداد كبيرة بس استوطنوا ومعملوش مذابح جماعية ولا جابوا البلد وسووها بالارض عشان يعيشوا هما.

حتقولي وعرفت منين ان بتوع البحر دول كانوا حيعملوا كده ،ما يمكن الناس كانت حتغزوا عادي ومش حيكون صراع حضاري يفني حضارة المصريين اقدماء

اقولك بسيطة جدا ولو صبرت انا كنت حقول لوحدي، من الي عملوه في طريقهم لمصر

تاخد مثال؟؟

خد مثال، فاكر(الحيثيين)، اه الي كان رمسيس ليل نهار بيتعارك معاهم دول؛ اهو تخيل يا مؤمن بقه ان واحد من نسل رمسيس يصعب عليه الحيثين ويحاول ينجدهم عسكريا

انت مصدق؟

طب يمين بعظيم حصل، مرنبتاح فعلا من هول الي عرفه من افعال الشعوب دي في طريقها ؛ لما عرف انهم وصلوا (حاتوشا) عاصمة الحيثيين، حرك نجدات عسكرية مصرية بس يا موصلتش في معادها يا امتن وصلت واتفرمت مع جيوش الحيثين الي تم افناء حضارتهم واتسوت بالارض مع مدينتهم.

ان ان آن

فعلا كانوا اغبيا، ومعملوش ده في (حاتوشا) بس انما عملوه في عشرات المدن الي كانت مزدهرة جدا بطول الساحل من شمال الاناضول لغاية غزة

هار اسود، ازاي يا جدع طب وبعدين حصل ايه؟

اقولك يا سيدي، حصل ان العالم القديم شكلوا تغيير تماما، انهارت الحضارتين الي كانوا بيمثلوا الاقطاب في الزمن ده

 (الحيثية) بشكل كلي (رغم ظهور حيثين جدد بس مكنوش بنفس القوة اطلاقا) والمصرية الي خسرت كامل مدن الساحل الكنعاني (الشامي) ، واستهلكت كتييييييير من موارها في دفع الغزو ده ؛

طب الشعوب دي جت منين؟

والله دي قصة كبيرة سعادتك والاختلاف فيها واسع بس ممكن بما اننا وصلنا لهنا ندي فكرة؛

 في عدة فرضيات منها انهم شعب طروادة الي هرب بعد سقوط المدينة؛ والفرضية دي قوية لعدة اسباب، منها توافق الخط الزمني لسقوط المدينة مع بدا اول موجات الغزو وتانيها الخط المكاني، بدا الغزو من سواحل الاناضول الشمالية (جنوب البحر الاسود وبحر مرمرة) وانت نازل بقه .

حاجة تانية بتاكد الفرضية دي؛ علما الاثار لاحظوا ان النحات المصري في لوحة الانتصار رسم الرموز الي كانت على دروع المهاجمين وعرفوا منها اسامي كتير من الشعوب دي، ومنها رمز لشعب (طروش)، طبعا اكيد عندك خلفية ان الحروف ممكن تتبدل وتتغير بحسب الزمن وادوات التعريف هي سابقة للكلمة ولا في اخرها، متعرفش؟ 

طب نخلي ده موضوع مقال تاني لو لينا نصيب ولو اصلا عجبكم الكلام الي انا بكتبه.

طب في فرضيات تانية ؟

اه الحقيقة الفرضيات كتير زي ما سبق وقلت، وحكتفي للمساحة بذكر فرضية تانية، انهم من شعوب اليونان والبلقان، هاجروا بالشكل ده بحثا عن موطن جديد ليهم نتيجة عده متغيرات حصلت للبيئة بتاعتهم، مثلا غزو من شعوب تانية اكتر منهم افترا وقساوة قلب، او ارتفاع في منسوب ملوحة التربة نتيجة تغيرات مناخية..الخ  

وده برضو احتمال قوي خصوصا انه متزامن مع حقبة مهمة تاريخيا وهي (انهيار العصر البرونزي) وبما اننا بنحكي كل ده اصلا عشان نفهم شكل الصدامات الحضارية بيكون ازاي فاكيد حنوصل طب وعملوا ايه بعد ما دمروا الدنيا بالمنظر ده. الحقيقة انهم استطونوا كامل منطقة الساحل الشامي بل ودخلوا وتتبعوا الهاربين لمناطق التلال والهضاب الخصبة، بس شوية كده وربك هدى النفوس والناس دي قعدت مع بعضيها وقالك حنفضل كده يعني لغاية امتى، ما خلاص بقه ربنا جبرنا ونكتفي بالي خدناه وكل قبيلة او شعب خدله حته ارض وقعد فيها ، 

وشوية منهم كمان تزاوجوا مع الي اتبقى من السكان الاصليين، بل وصل الامر ان بلد بالكامل اشتقت اسمها من اسم احد الشعوب دي، البلد هي (فلسطين)، والشعب هو (بلست)، طبعا عارفين ان فلسطين في اغلب اللغات ذات الاصل الهندواوربي بيتقال عليها (بلستين).

 

وبكده اتقفلت الصفحة دي من اول (صدام حضاري واسع)، وزي ما حضراتكم شوفتوا، كان دموي ومفزع ؛ الناس دي مجاتش عشان تنشر دينها ولا لغاتها ولا ثقافتها، الناس دي جت تدور على سبل المعيشة والحياة، طب جميل جدا ، كل ده بقه ايه علاقته بالموضوع الي احنا اصلا جايين المقال ده عشانه؟

اه تقصدوا دور السينما يعني؟

انتوا لسه فاكرين، ده كان كمين ، (وش بيضحك)

لا طبعا بهرج مش كمين ولا حاجة، هو متصل بالموضوع بس انا بحب زي اما قولت اضرب الامثلة واستعرض السياقات المختلفة عشان نسهل الموضوع لما نيجي نتعمق فيه،

يلا نتعمق بقه

احنا دلوقتي في نهاية الالفية الي فاتت وبداية الالفية الجديدة، موازين القوى في العالم كلها بيد الله طبعا، بس كامر واقع ولأمر رباني بقت في ايد دولة وحيدة ومعاها شوية حلفاء واخداهم ديكور لزوم الفخامة الدولة دي اتخلصت من اكبر كتلة مناوءة ليها (الكتلة الشرقية)، واصبح العالم وموارده بأجمعه غنيمة باردة ليها مستني منها تاخد الخطوة بس لان الغزو العسكري المباشر بمسوغات اقتصادية حيكون مفقوس قوي وكان موضة وبطلت، فوجود مبررات تانية اكيد حيكون لطيف، وهنا يشاء ربك تظهر نظرية اخونا (صامويل) في الصراع بين الثقافات الي بالمناسبة حط فيها الثقافة الاسلامية مخرجا لها من نطاق الايدولوجيا، معتبرا ان كل الدول ذات الاغلبية الاسلامية في عدد سكانها هي معسكر واحد، مهما اختلف نظام حكمها، ضيف ده حضرتك ان لاسباب ربانية برضو امريكا ملهاش يد فيها يعني ،اغلب الدول دي(الاسلامية) عايمة على اكبر احتياطي معروف من(الوقود الاحفوري) يضاف لذلك انها تتوسط وتتحكم في اهم الممرات الملاحية في الكوكب، سواحلها ماسكة من الهند شرقا للقرن الافريقي غربا، وفي نفس ذات الوقت ماسكة خطوط تماس مع اكبر منافس لامريكا متوقع صعودة في الوقت ده (الصين وافغانستان وباكستان)، وكل المناطق دي كانت لوقت قريب يا امتن حلفاء للخصم الرئيسي   الي ذهب ادراج الرياح (السوفييت)، يا امتن حكومات مناوءة بعد تحالف قصير، (حالة صدام حسين مثلا)

طب تعملي ايه يا بت يا امريكا تعملي ايه يا بت؛

بسيطة يا معلم، اضغط عالناس دي ووصلهم للاحتقان وخليهم يتجروا وينكشوني وانا اوريهم حعمل ايه

وفعلا احنا مكدبناش خبر، قضية فلسطينية اتسدت منافذ الحل ليها بالاربع لاءات الشهيرة، عقد كامل من مذابح المسلمين في شرق اوروبا وتدخل شكلي ثبت فيما بعد ان اعضاء من بعثات حفظ السلام الغربيين كانوا بيشتركوا في مهرجانات الدم والاغتصاب في البوسنة (وساعات كانوا بيكتفوا بالتسهيل)، وبعد البوسنة جت كوسوفا، وبعدها حرب الطاجيك مع حكومة مدعومة غربيا، وروسيا الي طوب الارض افترى عليها وقتها جت طلعت غلبها الشيشان، والحبل عالجرار

كل ده حيوصلك اكيد انك تحاول تقول انا هنا اهو، وفعلا حصل ، وجت حدثة (١١/٩) وكانت طرف الخيط الي محتاجينه عشان يعلنوها صريحة (حروب صليبية)، زي ما قالها بوش الابن و انت بس ابدأ وكل حاجة حتيجي سهلة بعد كده، وفعلا غزو لافغاستان (دراسات جيولوجية كتير بتأكد انها عايمة على مخزون هائل من المواد الخام المختلفة)، وبقه لينا موضع قدم كمان في قلب اسيا لاول مرة بعديها فعلا كل حاجة بقت سهلة ، وقرار الغزو التاني متاخرش كتير وتم غزو العراق بحجج ثبت كلها كدبها؛ (باي ذا واي للناس الي متعرفش كان من ضمن الحجج دي ان تنظيم القاعدة ليه فرع في العراق وقتها)  

طب تم اول غزو والراي العام العالمي سكت تحت ضغط غضب امريكا وقتها الي ناس شافت انه مبرر نوعا ما، دولة عايشة في العصور الوسطى بتهدم تراث انساني ومخبية ارهابيين عايزين يقتلونا، انما تجيبها ازاي كده مع العراق الي بيحكمها نظام لا يمت للشريعة بصلة لا من قريب ولا بعيد واخر تقرير للجان التفتيش النووي الي تلاه وقتها البرادعي في مجلس الامن قال لم نجد اي ادلة على وجود اي نشاط غير طبيعي بس سهلة ولقيناها

رايحين ننشر الديموقراطية !!

اه والله زي ما بقولك كده ده اتقال فعلا، حنغير النظام الديكتاتوري ونحيب حكومة تعبر عن الشعب العراقي، وحاشا للرب احنا لا طمعانين لا في احتياطي دهب ولا بترول العراق عالي الجودة ولا اي كلام من ده, طبعا الكلام ده ميدخلش على اي عيل في ابتدائية والعالم اتشقلب رأساً علي عقب؛ مظاهرات وهجوم عريض على امريكا وسياستها وبدا الامر يخرج من الايد ومفيش حد مقتنع بالمبررات الي بيطلعوا يحكوا عنها ، وماله الي ميقتنعش بالذوق نقنعه برضك بالذوق ، اتشقلب يا ابني عندك قلبلي في التاريخ كده وهاتلي العيال السمر المتربين دول عملوا ايه، وهاتلي كمان معاك وانت جي ظرف تاريخي مشابه للظرف ده، حملة عسكرية ابطالها من الشمال(الابيض اللطيف المقطقط) ، واعدائها من الجنوب الاسمر الوحش ده، طبعا اعتقد ملامح الصورة بدأت تترسم في خيال حضراتكم..

فعلا، بعد غزو العراق استحضرت هوليود حدثين من التاريخ البعيد، واعادت تقديمهم مره تانية، الاول بترتيب الاحداث مش الافلام؛ حلقة من حلقات الحروب الاخمنية الاغريقية، معركة ممر ترموبيلاي فيلم (300 اسبرطي) والحدث التاني كان حملة الاسكندر لفتح العالم.

طيب بالنسبة للافلام كجودة فنية وتصوير وكده، ملناش دعوة. وبالنسبة ليها كحدث تاريخي حنقر انها حصلت، بس حنحطها تحت المجهر زي ما قولنا ونشوف اللعب حصل فين، وهل اثر عليك كمتلقي ولا لأ؟ 

اولا(٣٠٠):- لو ركزنا مع الفيلم حنلاقيه بيسلط الضوء على عناصر سلبية في الاخمنين (الفرس) وبيختلق عناصر تانية، نرجع كده مع بعض ونفتكر حاجات مختلقة مثلا؛ ركزتوا مع شكل جنود وقادة الفرس؟ خدتوا بالكم ان الفيلم طلع اغلبهم (سود البشرة) والجزء التاني سمر؟ 

حتقولي وده معناه ايه؟

الاخمنين عزيزي المتابع واسف لو حصدمك بس كان مسيرك تعرف، يبقوا ولاد عم الاغريق لزم، ايون متستغربش، الاتنين ليهم نفس الاصل والمنشا، والاتنين بيتكلموا لغتين ليهم نفس الاسرة اللغوية (الاغريقيةوالافستية) من اللغات الهندواوربية. بل ازيدك من القصيد بيتا،الفرع الاخميني في الاسرة الهندواوربية ده جي من شجرة (الآريين).

ايه الاريين بتوع هتلر؟!

لا سيبك هتلر كان نصاب في الحته دي،ايران اصلا معناها (أرض الاريين)

ازاي الكلام ده، اه والله ده الي اتفق عليه اغلب علماء الانثروبولجي وعلما اللغات.

 تقصد تقول انهم كانوا بيض ومستحميين برضك زي الاغريق كده؟

ايوه فعلا دي حقيقة، هو اه كانوا بيعمولا زي ما كتير من الامبراطوريات بتعمل وبتجند من الشعوب المقهورة جنود بالجبر، بس على الاقل القادة بالكامل بيكونوا من نفس الاصل الاثني والعرقي للاسرة الحاكمة.

طب خدتوا بالكم من شكل دقونهم ؟؟

اه اغلبهم كانوا بدقون كثيفة، حد ممكن يقول عادي ده موجود فعلا في كل الرسومات في المعابد الفارسي، حقولة مش الفرس بس، ده اغلب شعوب الشرق كانت بتربي دقنها وتغطي راسها في الحرب والسلم؛ انما قولي شوفت كام صورة تاريخية حقيقية لواحد مربي داقنة وحالق شنبه عالجلد؟

اه، من ضمن القاده كان موجود الهيئة دي،

طب ما تفكرني كده الشكل ده والسمت ده بيفكرك بايه؟

ممممم، مربي دقنة وحالق شنبه ولابس عمة لف ذات ذؤابة واسمراني، مش فاكر المنظر ده؟ متاكد؟

ايون هو كده بالظبط, الصورة النمطية للمسلم العربي في العقل الجمعي الغربي.

طب والناس دي بعد ما اتصورت التصوير ده عايزة ايه بقه؟

عايزة تيجي تُفني الحضارة الاغريقية وتساوي المدن بالارض، كده من الباب للطاء ومن غير اي اسباب، هو افترا ولنشر رسالة البربرية في العالم.

الحضارة الاغريقية بالمناسبة برضو تعتبر الرافد الرئيس لكل ما تلاها من ثقافات وحضارات غربية واثرها ملموس لحد النهاردة في كل الدول الغربية بالذات امريكا وفي سبيل بقه هذا المخطط الفوضوي الشرير يلجا هؤلاء البرابرة كما اظهرهم الفيلم لكل الوسائل من رشوة وخيانة ....الخ

لدرجة ان الفيلم صور نهاية المعركة بانتصار الاخمنيين انتصار (خسيس), بمعنى انهم ما انتصروش عشان كانوا اكتر عددا ولا اشد بأسا وافضل تخطيطا، لا هما مكسبوش الا عشان قدروا يشتروا بالفلوس خائن من قلب الاغريق، يعني حتى سبب نصر الفرس في الاخر كان اغريقي، بس راجع كده في مخيلتك منظره كان شخص مشوّه، وكان خيانته وطباعه الفاسدة طفحت على جسمه وشكله،

اعتقد انها رسالة تانية من صناع الفيلم بيقولوا فيها ان حتى انتصاركم كان نتيجة خيانة للاغريقي بس ساقط شكلا وموضوعا الي هو يعني مش حنعترف ليكم بأي فضل في النصر الي اتحقق، هو الحقيقة النصر مكنش مفخرة أصلا، للفارق العددي الرهيب على الاقل، بس ده ميخليش صناع الفيلم يشوه كل ذكرى ليه، طبعا انا هنا اختصرت في الرسايل الي استشفتها من الفيلم على مستوى المكياج والابطال والسرد، على امل ان تكون رسالتي انا وصلت لحضراتكم.

 

حندخل في الفيلم التاني (الاسكندر) ونحاول نطلع منه برضو برسايل من مشاهده او باحداث ضرب صفحا عن ذكرها.

قصة الاسكندر من اولها لاخرها معروفة اعتقد كلنا درسناها في المدرسة ، خصوصا لو حضرتك بتقرا دلوقتي ومصري، بس اغلب الي درسناه كان خط سير منزوع الدسم لحملته العسكرية لفتح العالم. طبعا نسيبنا من هجص انه زيوس هو الي دخل على امه مكان فيليب والكلام ده، رغم ان الفيلم جابه وانا استغربت لانه كده طلع من نطاق السرد التاريخي للاسطورة، بس ما علينا نعديها ونشوف الخط الزمني الفعلي للاحداث وطبيعة تصوير الفيلم للاسكندر بصفته فاتح للعالم ومحرر ليه من طغيان الفرس الي بيستعبدوا الشعوب من الصين لمصر وجاب كام خطبة ليه كده موقفتش في اي مرجع تاريخي على نصوصهم كما ذكرهم الفيلم، بس نلاحظ ان خطب الاسكندر كانت فيها شبه كبير من خطب ليونايدس ملك اسبرطة وخطب جورج بوش الابن!

اه ده حقيقي، حاولوا لو عرفتوا تجيبوا الخطب دي وتسمعوها تاني ،حتلاقوا نفس المود العام والاجواء مسيطرة على كل الخطابات. طيب عمنا الاسكندر دلوقتي ربنا كرمه  وورث ملك ابيه وزي ما الفيلم جاب انه خد جيوش ابوه المدربة تدريب جيد جدا واستطاعت فرض سيطرة مقدونيا عافية وجبر على كامل بلاد الاغريق واجزاء من البلقان، وطلع بيهم عدا البحر ودخل الاناضول يعني شط اسيا.

ثواني معلش بس، اعتقد الفيلم نسي يقولنا بالتصوير حصل ايه في بلاد اليونان بعد موت فيليب الواقع ان عدد كبير من المدن الاغريقية ثارت على الاسكندر فور وفاة ابوة، والراجل كان خلقه ضيق، قرر يحسمها (صدمة ورعب)، كان في مدينة اسمها (طيبة- تيبتس)، تعتبر المتزعمة التمرد ده، ورفضت الانصياع بعد ما مدن تانية استسلمت فما كان من محرر العالم من الطغيان والمستبدين الا ان يسوي المدينة بالارض، لا حرفيا عمل كده، مخلاش فيها بناية قائمة ، ومش بس كده، شرد كل الي اتبقى من اهلها واستعبد حبة غير الاتقتل طبعا، وامعانا في الاذلال وزع ارضي المدينة كحيازات على جيرانها، حرفيا عمل الي بيقولوا عليه (حمسح اسمك من الوجود).  

بداية حلوه مفيش كلام للفاتح الي حينشر الثقافة الهيللينية (الاغريقية) في العالم، وحينقذ الشرق من حكم البرابرة وينور طريقهم بمشاعل التنوير الاوروبي، طبعا الفيلم بحسب ذاكرتي مجبش سيرة للكلام ده، لانه مش من مصلحة الصورة العامة المطلوبة في الحقبة دي ؛

احنا عايزين (آيدول) نمشي وراه، ونصدره للخصم كمان، لو مقهور من حكومتك الي بتشاركك نفس لونك ودينك وثقافتك ميهمكش، احنا حنيجي نحررك، راكبين دبابتنا البيضا، ومعنا التقدم وشوية ديموقراطية على ما قُسم كده.

حادثة تانية لا تقل بشاعة عن حادثة طيبة تغافل الفيلم عن ذكرها تماما، وهي حادثة (صور) مدينة فينقية عالساحل الشامي، وكانت محتلة فارسيا لغاية اما الاسكندر بدا حملته وهزم الفرس في الاناضول كذا مرة، بدأت المدن دي تعتبره منقذ ليها، (الفرس فعلا كانوا اغبيا) واستقبلته استقبال الفاتحين مش الغزاه وهو كان بارانويد جدا، وده فرحة خالص، لدرجة ان قرر يشارك في تقديم الهدايا للآلهة المحلية في كل مدينة، تقريبا اهل صور كانوا متطرفين سيكة، قالك لا ميحصلش، احنا بس الي نقدم القرابين محدش تاني يعملها.

قوم الاسكندر خد الموقف على صدره وشال وحز في نفسه جامد، وعشان ميروحش ضحية للاكتئاب وهو على وش حروب ومعارك ولسه قصادة كوكب عايز يغزوه وكده؛ قرر انه يأدب اهالي صور؛

 يقال ان عدد القتلى كان عشرات الالوف واستعبد تقريبا عشرين الف، وصلب كام الف تانيين. اه (صلب)، واحدة من ابشع طرق التعذيب والاعدام في التاريخ استخدمها الانسان الي عايز ينشر التحضر وفي الاخر راح قدم الهدايا (لملقارت) الي المشكلة كلها كانت دايرة عليه من الاول.

 للامانة يقال ان الحاكم الفارسي للمدينة حاول يقاوم بس حتى لو ده حصل عمره ما حيكون مبرر للي عمله الاسكندر.

الخلاصة انه كمل بعد كده زي ما شوفنا في بقيت الاحداث وكلنا عارفين وصل فين بس خلال طريقه ده الفيلم ركز على نقطة، هي اه فعلا حصلت وهي تجنيد الفرس ككتائب مساندة ليه بعد ما وصل ايران واظهر الفيلم ازاي كانوا طوع يمينه وماظهروش اي تمرد او عصيان، الصراحة انا لما ركزت في الحته دي زي ما اكون شوفت الي حصل بعد كده في العراق، الامريكان وصلوا و عمليات المقاومة كلفتهم كتير ، فلجأوا لتجنيد جيش وشرطة محليين بدل الي اتحلوا بامر من الحاكم العسكري وقتها بول بريمر للعراق.

 

.....

الي فات ده كان ابرز ما لفت نظري في الفيلمين واعتقد ان بربطها بالمقدمة الي سبقتها حنشوف حاجات كتير. يمكن انا فيا حاجة معرفش ميزة ولا عيب؛ انا مبحبش التوجيه قد ما بحب الرصد والتحليل والربط، فحاولت في المقال ده اني ارسم صورة كاملة لمرحلة عالمنا بيعيشها،ومتكررة في كل الحقب الزمنية وازاي ممكن الفن وهنا كان (السينما)، تلعب دور في خدمة اهداف سياسي ة(في نظري كانت بشكل فج)،

 معرفش حتوافقوني ولا لأ!

اعتقد انا دوري انتهى هنا، ومستني دور حضراتكم تكلموني عن رؤيتي، كانت صح ولا لأ، الرسايل دي فعلا وصلتك وخلتك تاخد جانب من الجوانب. طب هل اثرت فيك ولو بشكل نسبي في الواقع، وتبرر ولو بشكل لحظي غزو امريكا للدول.

واخيرا احب اشكر كل من اتسع صدره لقراءة ما كتبت، واعتذر لو اطلت في اول الحلقات، واتمنى للجميع الافادة مما قدمت ولو الفكرة كانت حلوة وعجبتكم يا ريت تقولوا ...